BALOZI BATILDA AWAKUTANISHA VIONGOZI WA DINI KWENYE IFTAR, AWASIHI KUDHIBITI, KUKEMEA MAOVU

Imewekwa tarehe: March 30th, 2025

Na Mashaka Mgeta, OMM TANGA

MKUU wa Mkoa wa Tanga, Mhe Balozi Dkt Batilda Burian, amewaasa viongozi wa dini kudhibiti na kukemea matendo maovu yanayochangia upotevu wa amani, umoja na mshikamano nchini.

Mhe Balozi Dkt Burian, ameyasema hayo wakati akizungumza kwenye Iftar aliyowaandalia viongozi wa dini jijini Tanga, Machi 29, 2025.

Amesema, pamoja na jukumu msingi ya viongozi hao kuombea amani ya nchi, wanapaswa, kila wanapobaini ukiukwaji wa misingi ya haki na umoja, wakemee kwa nguvu zote ili amani na mshikamano vidumu nchini.

"Niwaombe viongozi wa dini kuendelea kuombea amani ya nchi, lakini mtakapowabaini watu wenye nia ovu ya kuanzisha chokochoko, ni vema mkawaonya na kuishirikisha Serikali ili tuweze kuwadhibiti,"amesema Mhe Balozi Dkt Batilda.

Naye Mwenyekiti wa Kamati ya Amani Mkoa wa Tanga, Sheikh Juma Luuchu amewataka waumini wa dini zote kuendeleza matendo mema waliyoyashiriki kipindi cha mfungo wa Ramadhani na Kwaresma.

Alisema waumini hao wanapaswa daima, kudumisha amani hasa katika kipindi hiki cha kuelekea Uchaguzi Mkuu wa Rais, Wabunge, Wajumbe wa Baraza la Wawakilishi na Madiwani utakaofanyika baadaye mwaka huu.