DK MPANGO: MITAMBO MIWILI YA JNHPP KUWASHWA MWEZI UJAO

Imewekwa tarehe: February 21st, 2024

DK MPANGO: MITAMBO MIWILI YA JNHPP KUWASHWA MWEZI UJAO

Na Mashaka Mgeta na Zuberi Mgaya, HANDENI

MAKAMU wa Rais, Mhe Dk Philip Mpango, amesema mitambo miwili iliyopo kwenye bwawa la kuzalisha umeme la Mwalimu Nyerere (JNHPP), itawashwa mwezi ujao wa Machi mwaka huu, ikiwa ni sehemu ya jitihada za kukabiliana na upungufu wa nishati hiyo nchini.

Mhe Dk Mpango amesema hayo leo alipokuwa akizungumza na wananchi wa wilaya ya Handeni kwenye eneo la Kabuku, akiwa katika siku ya kwanza ya ziara yake ya siku tatu mkoani Tanga.

Kauli ya Mhe Dk Mpango ilitanguliwa na hoja ya Diwani wa Kata ya Kabuku Ndani wilayani Handeni, Mhe Abdallah Pendeza, kuainisha changamoto mbalimbali zinazoikabili kata hiyo ikiwemo mgawo wa umeme.

Mhe Dk Mpango amesema, awali, Serikali inayotekeleza mipango ya kitaifa na inayohusu maeneo mahususi kukabiliana na upungufu wa umeme, ilipanga kuwasha mtambo mmoja kuongeza umeme kwenye gridi ya taifa,  lakini iliahirishwa na badala yake itawashwa mitambo miwili mwezi ujao.

Kuhusu hatua mahususi za kupunguza changamoto ya hiyo kwenye baadhi ya maeneo mkoani Tanga, Mhe Dk Mpango amesema Serikali inajenga kituo cha kupozesha umeme katika kata ya Mkata wilayani Handeni, hivyo wananchi wanatakiwa kuwa na subira wakati mradi huo ukitekelezwa.

Mhe Dk Mpango, ameagiza kukamilika haraka kwa ujenzi wa kituo cha afya cha Kabuku, ili kuendeleza jitihada za Serikali ya Rais Mhe Dk Samia Suluhu Hassan, kuboresha afya za wananchi wake.

Naye Meneja wa TANESCO katika wilaya ya Handeni, Mwalimu Mussa Kassim, baada ya kuruhusiwa na Mhe Dk Mpango, akasema vijini 91 na mitaa 60 iliyopo wilayani humo imefikiwa na huduma ya umeme na kwamba vitongoji 250 kati ya 770 vilivyopo halmashauri ya wilaya hiyo ndivyo havijafikiwa na miundombinu ya umeme.

Mwalimu Kassim amemhakikishia Mhe Dk Mipango kuwa vitongoji hivyo vitafikiwa na huduma hiyo kabla ya Uchaguzi Mkuu wa 2025.