RAIS SAMIA 'AWALILIA' 11 WALIOFARIKI AJALI YA GARI HANDENI

Imewekwa tarehe: January 14th, 2025

Na Mashaka Mgeta, HANDENI

SIMANZI, majonzi na vilio vimetanda kuanzia usiku wa jana Januari 13,2025, kwenye kata ya Segera, wilaya ya Handeni mkoani Tanga, kufuatia vifo vya watu 11 na majeruhi 13, kutokana na ajali ya gari.

Mhe Rais Dk Samia Suluhu Hassan, ametuma salaam za rambirambi kufuatia vifo hivyo, kutoa pole na kuwatakia kupona haraka majeruhi wa ajali hiyo

Mkuu wa Mkoa wa Tanga, Mhe Balozi Dk Batilda Burian, pamoja na kuwasilisha salaam za Mhe Rais Dk Samia, amesema ajali hiyo imesababishwa na roli la mizigo lenye namba T 782 BTU.

Amesema, roli hilo liliacha barabara na kuelekea mahali walipokuwa watu wakiwaokoa majeruhi kutoka kwenye gari nyingine iliyotokea awali, ikilihusisha gari aina ya Tata lenye namba T 720 EJP.

Kwa kujibu wa Mhe Balozi Dk Batilda, gari hilo kutoka Dar es Salaam kwenda Moshi, lililobeba abiria ambao idadi yao haijajulika, lilipinduka kwenye kijiji cha Chang'ombe, hivyo wakazi wake  na wale wa kijiji jirani Cha Maili Kumi, kwenda kushiriki uokozi.

Wakiwa katika kutekeleza azma hiyo, Mhe Balozi Dk Batilda anasema, ndipo roli hilo likisadikiwa kukata breki, lilipoteza mwelekeo na kwenda eneo waliokuwa wanakijiji wanaokisiwa kufikia 50 na kuwagonga baadhi yao.

Mhe Balozi Dk Batilda, amesma Serikali inachukua hatua mbalimbali kuhakikisha kasoro zilizopo kwenye barabara ya Chalinze – Segera zinarekebishwa, ili kukidhi mahitaji ya sasa yaliyo tofauti na ilivyokuwa miaka ya 1980 ilipojengwa.

Amesema,  watu waliokufa, wengi wao wakiwa ni vijana, walikuwa na nia njema ya njema na mioyo yenye huruma kuwasaidia majeruhi, lakini wakajikuta wanapoteza maisha.

Hoja hiyo inathibitishwa na majeruhi, Faraja Abdallah, mkazi wa mkazi wa Maili Kumi, aliyelazwa hospitali ya Magungu, kufuatia kujeruhiwa huku ‘akiwapoteza’ jamaa zake watano waliofariki.

Mganga wa Mfawidhi wa Hospitali ya Magunga - Korogwe, Dk Paul Patrick amethibitisha kupokea miili ya watu 11 na majeruhi 13.

Amesema hadi kufikia leo asubuhi, miili nane ilikuwa imetambuliwa wakati majeruhi saba wanapelekwa Hospitali ya Rufaa ya Mkoa wa Tanga - Bombo kwa matibabu zaidi.

Mashuhuda kadhaa wameelezea namna ajali hiyo ilivyotokea na kugharimu maisha ya watu, wengi wao wakiwa ni vijana kutoka katika vijiji vya Chang’ombe na Maili Kumi.

Ester Bonifas ni mmoja wa majeruhi wa ajali ya gari aina ya Tata, anasema abiria wengi (hakutaja idadi) waliosafiri kutoka Dar es Salaam walishukia Segera, umbali wa kilomita 4.2 hadi Chang’ombe palipotokea ajali hiyo, na kuingia wengine waliokaribia kwa idadi ya walioshuka.

Naye Zaituni Njala, mkazi wa Chang’ombe amesema familia yao ilipata taarifa ya kifo cha kijana wao,  Nassib Waziri (35) waliokuwa wanamtegemea katika mahitaji yao.

‘’Tuna majonzi sana, nguvu kazi na tegemea letu ameondoka,’’ anasema kwa huzuni akiwa nje ya chumba cha maiti kwenye hospitali ya Magunga.

Mohamed Mwakigonda, mkazi wa Maili Kumi anasema, ajali nyingi zimeshuhudiwa kutokea kwenye eneo hilo, hivyo kutoa rai kwa mamlaka husika kuwekeza zaidi katika ukaguzi wa magari ikiwemo mifumo ya breki.

Kwa upande mwingine, miongoni mwa wakazi wa vijiji hivyo wamefika kwenye eneo la ajali, wakitafuta vitu wanavyovitambua kuwa vya ndugu zao waliofariki ama kujeruhiwa.

Miongoni mwao walionekana wakiokota viatu, wakidai kuwa vilivaliwa na ndugu zao wakati wakienda kwenye eneo la tukio.

Mwisho